Басты бет > Мәдениет > Шымкент қаласының әкімі Ерлан Айтаханов Нұр-сұлтан қаласында баспасөз брифингін өткізді

Шымкент қаласының әкімі Ерлан Айтаханов Нұр-сұлтан қаласында баспасөз брифингін өткізді

ШЫМКЕНТТІҢ ӘЛЕУМЕТТІК-ЭКОНОМИКАЛЫҚ ДАМУЫ    

   Бүгін Нұр-Сұлтан қаласындағы ҚР Президенті жанындағы Орталық коммуникациялар қызметінің алаңында Шымкент қаласысының әкімі Ерлан Айтаханов баспасөз конференциясын өткізді. 

Онда шаһар басшысы қаланың әлеуметтік-экономикалық дамуы бойынша 11 айда атқарылған жұмыстар жайын баяндап, мегаполисті дамыту бағытындағы жоспарларымен бөлісті.

 

Ерлан Қуанышұлының айтуынша, 2019 жылдың 11 айында өнеркәсіп өнімі 16,4 пайызға, ауыл шаруашылық өнімі 5,5 пайыз,  пайдалануға берілген тұрғын үйлер көлемі 15,3 пайыз, бөлшек сауда көлемі 7,1 пайызға артқан.

«Шымкент – республикалық қала статусын иемденуімен қаланың іскерлік белсенділігі өсіп, күн санап халықтың санымен ғана емес, экономикалық қуатымен де қарқынды дамып келеді. Қала экономикасының орнықты дамуына өнеркәсіп саласының маңызы зор. Салада ағымдағы жылы 26 млрд. теңгеге 7 жоба  жүзеге асырылып, 389 жаңа жұмыс орындары ашылды. Кәсіпкерлік санмен ғана емес, жаңа технологиямен жабдықталған сапалы өніммен де толығуда. Мәселен, «Рахат Шымкент» ЖШС-і Оңтүстік Кореялық компаниясының қаржысы есебінен құны 1,8 млрд.теңгеге мармелад өндіру желісін іске қосты» деді қала басшысы.

Шымкенттің экономикасына тартылған инвестиция туралы мәлімдеген Ерлан Қуанышұлы қалада жұмыс істейтін 2 индустриялық аймақтың жерлері 100% игерілгенін атап өтті. Яғни, аталған аймақтарда бүгінде құны 42 млрд. теңгеге 67 жоба іске қосылып, 4 мыңға жуық адам жұмыспен қамтылған. Олармен мемлекеттік бюджетке 16 млрд.теңге көлемінде салық түскен. Сонымен қатар, қала бойынша шетелдік инвесторлардың қатысуымен 2,5 млрд. АҚШ долларын құрайтын 15 инвестициялық жобалар жүзеге асырылуда.

-Қалаға инвестиция тарту мақсатында Сингапур, Түркия, Қытай, БАӘ, Ресей және Корея мен Өзбек елдерінің әлеуетті инвесторларымен кездесулер өткізілді. Нәтижесінде өзбек инвесторларының қатысуымен ағымдағы жылдың 5-ші желтоқсанында қаламызда бірнеше жылдан бері тоқтап тұрған «Альянс» ЖШС (бұрынғы «Ютекс» АҚ) жіп иіру фабрикасы іске қосылды. Осы жылдың соңына дейін 60 тонна, ал келесі жылы 6 мың тонна мақта-талшығы өнімдерін шығаруға мүмкіндік береді. Екінші кезеңде бұрынғы «Меланж» АҚ-ы іске қосылады. Нәтижесінде жоғары сапалы тоқыма өнімдері Түркия, Қытай, Оңтүстік Корея, Италия, Ресей елдеріне экспортқа шығарылады. Бұл өз кезегінде елімізде өңделетін мақта көлемін 2 есеге арттырады және 800 адамға жұмыс орнын береді, – деп хабарлады Е.Айтаханов. 

 

Баспасөз конференциясында сонымен қатар, келер жылы аумағы 306 гектарды құрайтын үшінші жаңа «Жұлдыз» индустриялық аймағы мен ауылшаруашылық өнімдерін терең өңдейтін аумағы 136 гектар болатын «Агроиндустриалды аймақ» құрылатыны мәлім болды. Бүгіннің өзінде «Жұлдыз» ИА 20 млрд.теңгеге 1 мыңға жуық жаңа жұмыс орнымен 20 жобаны жүзеге асыруға инвесторлар ниет білдірсе, ал агроиндустриалды аймақта 109 млрд.теңгені құрайтын 20 жоба жүзеге асырылып, 1 мыңнан астам тұрақты жұмыс орындарын ашу көзделуде екен.

Елбасының 5 әлеуметтік бастамасы аясында  осы жылы 350 және 200 орындық екі жатақхана құрылысы аяқталып, Оңтүстік Қазақстан мемлекеттік педагогикалық университетіне пайдалануға берілді. Келесі жылы «Шымкент» ӘКК арқылы 2 500 орындық жатақхана салу жоспарлануда.

Шымкент қаласында жаңа оқу жылынан бастап жан басына қаржыландыру жүйесі енгізілді. Бұл жаңа мектеп құрылыстарын салуға инвесторларды тартуға мүмкіндік берді. Биылғы жылдың өзінде 5 мың орындық  11 жекеменшік мектеп ашылса, бюджет есебінен, 5 700 орынға арналған 9 мектеп құрылысы жүргізіліп, 5 білім ошағы пайдалануға берілді. Нәтижесінде, үш ауысымды 4 мектептің мәселесі шешілді. Ал алдағы үш жылда жан басына қаржыландыру жүйесі арқылы 10 мектеп құрылысы жеке инвесторлармен бірлесе жүргізілетін болады.

 

Денсаулық сақтау саласындағы көрсеткіштерге тоқталған Шымкент әкімі өткен жылдың тиісті кезеңімен салыстырғанда салада оңды динамика қалыптасқанын айтып, осы салада жүзеге асырылатын жобаларымен бөлісті.Спикердің хабарлауынша, ана өлім-жітімі 63,6 пайызға, қатерлі ісіктерден 4,6 пайызға, туберкулезден – 6,6 пайызға төмендеген.

«Денсаулық сақтау саласын жетілдіру мақсатында денсаулық сақтау нысандарын дамытудың 3 жылдық жоспары қабылданды. Осының аясында жедел жердем қызметінің сапасын жақсарту үшін тозығы жеткен автокөлік паркіне мемлекеттік-жекешелік әріптестік арқылы 100 жаңа арнайы автокөліктер берілді. Ол жерде бірінғай «Колл-центр» іске қосылып, қызмет сапасы және бригаданың қысқа мерзімде жетуіне  ықпал етеді. Сонымен қатар, мемлекеттік-жекешелік әріптестік аясында 2 ірі жоба іске асырылды. Олардың бірі «Медикер» заманауи медициналық орталығы. Бұл, қаладағы екі мемлекеттік емханалардағы жүктемені 20-30 мың адамға жеңілдетеді. Екіншісі Қайтпас-1 шағынауданындағы 500 орындық емхана. Ол нысан келер жылдың қаңтар айында пайдалануға беріледі. Сондай-ақ, жеке инвестор есебінен 1000 орындық көпсалалы аурухананың құрылысы басталады» деді Е.Айтаханов.

2019 жылы қалада 2 847 пәтерлі 53 тұрғын үй пайдалануға берілді. Оның ішінде жұмысшы жастарға 904 пәтер, көпбалалары отбасыларға 450 пәтер, халықтың әлсіз топтарына 252 пәтер. Келесі жылы «Тұран» мөлтекауданында 4 496 пәтерлі 68 көп қабатты тұрғын үйдің құрылысы басталады. Сондай-ақ, тұрғын үй құрылысының көлемін арттыру үшін «Шымкент» ӘКК арқылы 5 493 пәтерлі  75 тұрғын үй салынады. Оның ішінде 2020 жылы 1 016 пәтерлі 24 тұрғын үй пайдалануға беріледі.

Қалаға жаңадан қосылған 41 елді-мекеннің инженерлік-коммуникациялық инфрақұрылымын дамыту мақсатында  арнайы жұмыс жоспары әзірленіп, тиісті жұмыстар жүргізілді. Нәтижесінде 2020 жылы 8 тасымалмен су ішіп отырған 72 мың, жартылай қамтылған 9 елдімекендегі 38 мыңнан астам халық ауыз сумен қамтылады.  Ал, 35 елдімекенде электр сапасы төмен. Оларды сапалы электр қуатымен қамту үшін 3 подстанцияның және 13 елдімекенде электр желісінің құрылысы жүргізілуде. Келесі жылы аталған жобаларды іске асыру арқылы 40 мыңға жуық қала тұрғындары сапалы электрмен қамтылатын болады. 

 

Қала тұрғындарын газбен қамту үшін Шымкентте №3 АГРС құрылыс жұмыстары басталды. Сондай-ақ, 2020 жылы «Сапақ Датқа» ауылынан ұзындығы 13,5 км, қуаттылығы 25,0 мың м3 сағатына құрайтын магистралды газ құбырын салу жоспарлануда. Бұл қаланың  2-3 жылдық қажеттілігін толық жабады.

 

Ағымдағы жылы 43 көше күрделі, 39 көшеге орташа жөндеу жұмыстары жүргізілді. Сонымен қатар, 90 км топырақ жолдарға тас төселді. 2020 жылы шалғайда орналасқан 40 елдімекеннің сексен негізгі көшелерін асфальттау жұмыстарын жүргізіп, қоғамдық көлік жүргізу мәселесі қаралады. Елді мекендердегі 48 көше күрделі, 73 көше орташа жөндеуден өтеді және топырақ жолдарға толығымен тас төселетін болады. Қаланың 7 магистралды көшелерін  орташа жөндеу жұмыстары жүргізіледі.

 

Елбасының тапсырмасымен жеке инвесторлардың есебінен Шымкентте жаңа әуежай терминалының құрылысы басталды, 2020 жылы аяқталады. Сонымен қатар, келесі жылы Темір жол вокзалының ғимараты қайта құрудан өтетін болады.     

Әлеуметтік салада нәтижелі жұмыспен қамтуды және жаппай кәсіпкерлікті дамыту» бағдарламасы іске асырылуда.  Есепті кезеңде 35 мыңға жуық азамат (2018 ж. – 29 341) әлеуметтік қолдау шараларымен қамтылды.

Елбасының «Болашаққа бағдар: рухани жаңғыру» атты бастамасын іске асыру мақсатында Әл-Фараби бабамыздың «Қайырымды қала тұрғындары» атты атақты еңбегіне сүйене отырып, Шымкент шаһарына қала әкімі «Қайырымды қала» деген балама атау ұсынды. Оны қала тұрғындары ерекше ықыласпен қолдады. 

Қазіргі таңда, қалада пилоттық режимде «MEYIRIM.KZ» қайырымдылық электронды порталы жұмысын жасауда Бүгінгі таңда портал арқылы 1246 отбасыға азық-түлік, тұрмыстық қажеттілік заттарымен көмек көрсетілді. Бүгінгі таңда портал арқылы 1246 отбасыға азық-түлік, тұрмыстық қажеттілік заттарымен көмек көрсетілді. Демеушілердің есебінен жалғыз басты және көп балалы аналарға 45 пәтер берілді (Корпорация Сити Строй,  КазМедеоГранд, Атамакен корпорациясы, А.Р.Т құрылыс, Отау – строй, Канфар-Бюлдинг ЖШС, Қорлар – Ізгілік   Василия, Сайман).

Сонымен қатар, қалада 244 қайырымдылық іс-шаралар өткізіліп, 5519 жағдайы төмен отбасыларға азық-түлік, киім-кешек, гигиеналық заттар мен көмір тағы басқада қаржылай көмектер көрсетілді.