Басты бет > Саясат > Шымкенттік үшемнің анасына көмек көрсетілді

Шымкенттік үшемнің анасына көмек көрсетілді

Шымкент қаласында үшемді дүниеге әкелген көпбалалы ана Фозила Досметоваға демеушілер көмек көрсетіп, қаланың орталығынан 3 бөлмелі пәтерді жалға алып берді. ҚМДБ-ның Шымкент қаласы бойынша өкіл имамы Бақтыбай Бейсенбаев көпбалалы ананың жағдайына бей-жай қарамай, жергілікті демеуші азаматтарды жұмылдырып, Ф.Досметоваға қамқорлық танытты. Қайырымды жандардың көмегімен көпбалалы ана Қонаев даңғылы мен Жандосов көшесінің қиылысынан 3 бөлмелі жалдамалы пәтерге орналасты.

   

Көпбалалы ана 6 баласымен бұған дейін өз қаржысына пәтер жалдап келген. Бүгінде ол қалада мемлекеттік баспана кезегінде тұр. Енді кезегі келгенге дейін бұл отбасы демеушілер тарапынан берілген осы пәтерде тұрады.

ҚМДБ-ның Шымкент қаласы бойынша өкіл имамының орынбасары Мұхамеджан Естеміров азан шақырып, сәбилерге ат қойды. Еске салсақ, Фазиланың Бәкір, Әли, Омар есімді үшемдерден бөлек 3 перзенті бар. Үлкені Гүзәл 11 сыныпта, кейінгісі Шадиер 10 сыныпта оқиды. Сондай-ақ 6 жасар Индира есімді қызы бар.

   

Бұл отбасыға Шымкент қалалық жұмыспен қамту және әлеуметтік қорғау басқармасының қызметкерлері де қол ұшын бермек. Үшемнің анасы мемлекет тарапынан көпбалалы отбасыларына берілетін тиісті әлеуметтік көмекпен қамтамасыз етіледі.

Медиаон ақпарат