Басты бет > Мәдениет > ТҮРКІСТАНДАҒЫ ҚАЗАҚ БАТЫРЛАРЫ КӨРМЕСІН БЕЛЬГИЯЛЫҚТАР ДА ТАМАШАЛАДЫ

ТҮРКІСТАНДАҒЫ ҚАЗАҚ БАТЫРЛАРЫ КӨРМЕСІН БЕЛЬГИЯЛЫҚТАР ДА ТАМАШАЛАДЫ

19
views

Түркістанда Елордамыз Астана қаласының 20 жылдық мерейтойы және «Әзірет Сұлтан» мемлекеттік тарихи-мәдени қорық-музейінің 40 жылдығына орай Абылай ханның немересі Кенесары Қасымұлының өмірі мен қайраткерлігіне арналған «Қазақта Кенекемдей ер өтпеген…» көрмесі өтті.

Дербес мемлекет құру қазақ халқының ғасырлар бойы аңсаған арманы болғаны белгілі. Тәуелсіздік жолында бүкіл өмірін сарп еткен хандарымыз бен билеріміз, батырларымыз аз емес. Солардың бірі де бірегейі – Кенесары Қасымұлы. Қазақтың соңғы ханы Кенесары Қасымұлы – өшпес өршілдігімен, қайтпас қайсарлығымен, халыққа деген риясыз көңілімен ел есінде мәңгі қалған.
Тарихи мәні терең көрмеде «Әзірет Сұлтан» қорық-музейінің қорында сақталған Кенесары ханның Орынбор шекарасының басшысы генерал-майор Г.Ф.Генсқа 1842 жылы жазған хатымен қатар, Омбы облыстық өлкетану музейінде сақталған қару-жарақтарының суреті, Түркістан облыстық тарихи өлкетану музейінде сақталған Кенесарының қылышы мен Санкт-Петербург музейінде сақталған кісе белдігінің суреттері және сол кезеңдегі орыс әскерінің қарулары, Лефоше револьвері мен ХІХ ғасыр винтовкасының түпнұсқасы, Қоқан әмірлігі зеңбірегі, тарихшы ғалымдардың Кенесары Қасымұлы туралы зерттеу еңбектері қойылған.
Шараға Түркістан қаласына Бельгия және Голландия елдерінен келген шетелдік туристер, музей қызметкерлері мен қала тұрғындары, бұқаралық ақпарат құралдары қатысты.
«Әзірет Сұлтан» қорық-музейінің директоры Ахметжанов  Нұрболат Қадырұлы жиынға қатысушыларды айтулы көрменің ашылуымен құттықтап, маңыздылығын жеткізді.
«Музей қорында сақтаулы әрбір жәдігер жеке дара тарихи мәнге ие. Оларды қадірлеп, қастерлеу, көздің қарашығындай сақтау басты міндетіміз. Елбасы Нұрсұлтан Әбішұлы Назарбаевтың «Болашаққа бағдар:рухани жаңғыру» бағдарламасында атап көрсеткен ұлттық болмысымыз бен ұлт болып қалыптасу жолындағы тарихымызды ұрпақ баласына насихаттауда тұлғалардан қалған мұралардың маңызы зор.»Әзірет Сұлтан» мемлекеттік тарихи-мәдени қорық-музейінің қорында 25000-нан аса құнды тарихи жəдігерлер қордаланса, оның ішінде өздеріңіз көріп отырған
батыр бабалар аманатының орны ерекше. Жәдігерлер  қатары алдағы уақытта да толығатынына кәміл сенемін»,-деді музей басшысы Н.Ахметжанов.
Сондай-ақ, Бельгия елінен келген қонақтар да барша түркістандықтар мен музей қызметкерлерін Елодамыз Астана қаласының 20 жылдығы және «Әзірет Сұлтан» қорық-музейінің  40 жылдық мерейтойымен құттықтап,  музей қызметкерлеріне шексіз алғысын білдірді.
Көрменің мақсаты- Елбасы Нұрсұлтан Әбішұлы Назарбаевтың «Болашаққа бағдар:рухани жаңғыру» бағдарламалық мақаласында көрсетілген тарихи құндылықтарды кеңінен дәріптеу, «Әзірет Сұлтан» мемлекеттік тарихи-мәдени қорық-музейі қорында 40 жылдан бері жинақталып келе жатқан ең қастерлі, тарихи жәдігерлермен жұртшылықты таныстырып, деректері жөнінде мағлұмат беру, жастарды өткенді құрметтеп, қадірлеуге шақыру, отансүйгіштікке баулу болып табылады.

Медиаон ақпарат

Добавить комментарий

Ваш e-mail не будет опубликован. Обязательные поля помечены *