Басты бет > Саясат > ОҚО ауыл шаруашылығы өнімінің үлесі бойынша 2-орынға шықты

ОҚО ауыл шаруашылығы өнімінің үлесі бойынша 2-орынға шықты

Оңтүстік Қазақстан облысы ауыл шаруашылығы жалпы өнімінің көлемі 2017 жылы 522 397 млн. теңгені құрап,  2016 жылмен салыстырғанда 2 пайызға артты. Оның ішінде мал шаруашылығы – тиісінше – 231 177 млн. теңге болып 4,2 пайызға көбейді. Нәтижесінде республикадағы ауыл шаруашылығы жалпы өнімінің үлесі бойынша облыс 2-орынды иемденді. Бүгін бұл туралы ОҚО өңірлік коммуникациялар қызметінде өткен брифингте облыстық статистика департаментінің басшысы Айдар Әбілдабеков мәлім етті.

Сондай-ақ, 2017 жылы облыста өнеркәсіп кәсіпорындарымен қолданыстағы бағамен 858 458 млн. теңгенің өнімі өндірілген.

«Кен өндіру өнеркәсібі және карьерлерді қазу саласында – 181 098 млн. теңге, өңдеу  өнеркәсібінде – 585 740 млн. теңге, электрмен  жабдықтау, газ, бу беру және ауаны баптауда – 76 435 млн. теңге және сумен жабдықтау, кәріз жүйесі, қалдықтардың жиналуын және таратылуын бақылау бойынша – 15 185 млн. теңгенің өнімі өндірілді», -деді Айдар Ахметбекұлы.

Айта кетерлігі, республикадағы өнеркәсіп өнімінің үлесі бойынша 3,8 пайыз көрсеткішпен облыс 8-орынды, ал өсу қарқыны бойынша 11-орынды алып отыр.  

  Департамент басшысының айтуынша, өңірде жұмыс істеп тұрған шағын және орта кәсіпкерлік субъектілерінің саны 2018 жылғы 1 қаңтарда 213 028 бірлікті құраған. Қазақстан Республикасы бойынша жұмыс істейтін субьектілердің 13,8 пайызы Оңтүстік Қазақстан облысына тиесілі.

2017 жылдың 9 айының көрсеткіші бойынша шағын және орта кәсіпкерліктегі субъектілерінің өнімі 755 181 млн. теңгені құрап,  2016 жылдың тиісті кезеңімен салыстырғанда 9,2 пайызға артқан.

Медиаон ақпарат

 

Добавить комментарий

Ваш адрес email не будет опубликован.